ಚ ಕಿತ್ತೂರು: ಐತಿಹಾಸಿಕ ವೀರರ ಭೂಮಿ, ಸ್ವಾತಂತ್ರ್ಯದ ಮೊದಲ ಕಿಚ್ಚು ಹಚ್ಚಿದ ಕಿತ್ತೂರಿನಲ್ಲಿ ಪ್ರತಿವರ್ಷ ಅತ್ಯಂತ ವಿಜೃಂಭಣೆಯಿಂದ ಆಚರಿಸಲ್ಪಡುವ ಐತಿಹಾಸಿಕ ಕಿತ್ತೂರು ಉತ್ಸವ ಹತ್ತಿರವಾಗುತ್ತಿದ್ದರೂ, ಸಿದ್ಧತೆಗಳು ಮಾತ್ರ ಅತ್ಯಂತ ನಿಧಾನವಾಗಿ ಸಾಗುತ್ತಿರುವುದನ್ನು ನೋಡಿದ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ಉತ್ಸವ ಆರಂಭಗೊಳ್ಳಲು ಇನ್ನು ಕೇವಲ 11 ದಿನಗಳು ಮಾತ್ರ ಬಾಕಿ ಉಳಿದಿವೆ. ಆದರೆ ಇಲ್ಲಿಯವರೆಗೆ ಮಹಿಳಾ ವೇದಿಕೆಯ ಉಪಸಮಿತಿ ಸಭೆ ಹೊರತುಪಡಿಸಿದರೆ, ಉತ್ಸವದ ಬೇರೆ ಯಾವುದೇ ಪ್ರಮುಖ ಉಪಸಮಿತಿಗಳ ಸಭೆಗಳು ಇನ್ನೂ ಜರುಗಿಲ್ಲ ಎಂಬುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ಸ್ವಚ್ಛತೆ ಹಾಗೂ ಸೌಂದರ್ಯೀಕರಣದ ಮರೀಚಿಕೆ: ಊರಿನ ಹಾಗೂ ಐತಿಹಾಸಿಕ ಕಿತ್ತೂರು ಕೋಟೆಯ ಸುತ್ತಮುತ್ತಲಿನ ಸ್ವಚ್ಛತಾ ಕಾರ್ಯಗಳು,ಅರಳಿಕಟ್ಟೆ ಹಾಗು ರಸ್ತೆ ಅಗಲೀಕರಣ ಇನ್ನೂ ಪೂರ್ಣಗೊಂಡಿಲ್ಲ; ಲಕ್ಷಾಂತರ ಪ್ರವಾಸಿಗರು ಮತ್ತು ಇತಿಹಾಸ ಪ್ರೇಮಿಗಳು ಭೇಟಿ ನೀಡುವ ಈ ಐತಿಹಾಸಿಕ ಸ್ಥಳದಲ್ಲಿ ಕನಿಷ್ಠ ಮೂಲಭೂತ ಸ್ವಚ್ಛತೆಯೂ ಇಲ್ಲದಿರುವುದು ಆಡಳಿತ ವರ್ಗದ ನಿರ್ಲಕ್ಷ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ.
ರೂ. 5 ಕೋಟಿ ಅನುದಾನವಿದ್ದರೂ ಕಣ್ಣಿಗೆ ಕಾಣದ ಬದಲಾವಣೆ: ಈ ಬಾರಿಯ ಕಿತ್ತೂರು ಉತ್ಸವಕ್ಕೆ ಸರ್ಕಾರದಿಂದ ಬರೋಬ್ಬರಿ 5 ಕೋಟಿ ರೂಪಾಯಿಗಳ ದೊಡ್ಡ ಮೊತ್ತವನ್ನು ಮೀಸಲಿಡಲಾಗಿದೆ. ಆದರೆ, ಈ ಹಣ ಜನರ ಅನುಕೂಲತೆಗಾಗಲಿ ಅಥವಾ ಊರಿನ ಸೌಂದರ್ಯ ವರ್ಧನೆಗಾಗಲಿ ಬಳಕೆಯಾದಂತೆ ಕಾಣುತ್ತಿಲ್ಲ. ಹಿಂದೆ ಕೇವಲ ಒಂದು ಕೋಟಿ ರೂಪಾಯಿ ವೆಚ್ಚದಲ್ಲಿ ನಡೆಸುತ್ತಿದ್ದ ಉತ್ಸವಕ್ಕೂ, ಈಗ 5 ಕೋಟಿ ರೂಪಾಯಿಗಳ ಬೃಹತ್ ಮೊತ್ತದಲ್ಲಿ ನಡೆಯುತ್ತಿರುವ ಉತ್ಸವಕ್ಕೂ ಯಾವುದೇ ಮಹತ್ತರ ವ್ಯತ್ಯಾಸವಾಗಲಿ, ವಿಜೃಂಭಣೆಯಾಗಲಿ ಅಥವಾ ಸೌಕರ್ಯಗಳ ವೃದ್ಧಿಯಾಗಲಿ ಸಾರ್ವಜನಿಕರಿಗೆ ಕಂಡುಬರುತ್ತಿಲ್ಲ!
ಅನವಶ್ಯಕ ವೆಚ್ಚದ ಬದಲು ಮೂಲಭೂತ ಸೌಕರ್ಯಕ್ಕೆ ಆದ್ಯತೆ ಕೊಡಿ: ಕಳೆದ ಬಾರಿ ಕೇವಲ ಒಂದು ರಸಮಂಜರಿ ಕಾರ್ಯಕ್ರಮಕ್ಕಾಗಿ ಕೋಟಿಗಟ್ಟಲೆ ಹಣವನ್ನು ವ್ಯಯಿಸಲಾಗಿತ್ತು! ಅದರ ಬದಲು ಉತ್ಸವಕ್ಕೆ ಆಗಮಿಸುವ ಸಾರ್ವಜನಿಕರಿಗೆ ಅನುಕೂಲವಾಗುವಂತಹ ಕಾರ್ಯಗಳನ್ನು ಕೈಗೊಳ್ಳಬೇಕಿತ್ತು ಎಂಬುದು ಸಾರ್ವಜನಿಕರ ಅಭಿಪ್ರಾಯ. ಮುಂಜಾನೆಯಿಂದ ಸಂಜೆ 4 ರವರೆಗೆ ನಡೆಯುವ ಜ್ಯೋತಿ ಮೆರವಣಿಗೆಗೂ ಮೊದಲು, ಚನ್ನಮ್ಮ ಸರ್ಕಲ್ ಬಳಿ ಚಿಕ್ಕ ಮಕ್ಕಳು, ಹೆಣ್ಣುಮಕ್ಕಳು ಹಾಗೂ ವೃದ್ಧರಿಗೆ ಸ್ವಲ್ಪ ಉಪಹಾರದಂತಹ ಅನುಕೂಲತೆ ಒದಗಿಸಿದರೆ ಮತ್ತು ಬಿಸಿಲಿನ ಬೇಗೆಯಿಂದ ಪಾರಾಗಲು ಜನರಿಗೆ ಮಜ್ಜಿಗೆಯಂತಹ ತಂಪು ಪಾನೀಯಗಳ ವ್ಯವಸ್ಥೆ ಮಾಡಿದರೆ ಆ ಹಣ ಎಷ್ಟೋ ಸಾರ್ಥಕವಾದೀತು ಎಂದು ಜನರು ಆಶಯ ವ್ಯಕ್ತಪಡಿಸುತ್ತಿದ್ದಾರೆ.
ಜನಮಾನಸದಲ್ಲಿ ಕಾಟಾಚಾರದ ಉತ್ಸವದ ಅನುಮಾನ: "ಜಿಲ್ಲಾಡಳಿತ ಈ ಉತ್ಸವವನ್ನು ಕೇವಲ ಜನರ ಕಾಟಾಚಾರಕ್ಕಾಗಿ ಮಾಡುತ್ತಿದೆಯೇ?" ಎಂಬ ಗಂಭೀರ ಪ್ರಶ್ನೆ ಇಂದು ಕಿತ್ತೂರು ಜನತೆಯ ಮನಸ್ಸಿನಲ್ಲಿ ಮೂಡಿದೆ. 5 ಕೋಟಿ ರೂಪಾಯಿ ಅನುದಾನವನ್ನು ಸಂಪೂರ್ಣವಾಗಿ ಮತ್ತು ಸರಿಯಾದ ರೀತಿಯಲ್ಲಿ ಸದುಪಯೋಗಪಡಿಸಿಕೊಂಡರೆ ಉತ್ಸವವನ್ನು ಅತ್ಯದ್ಭುತ ಹಾಗೂ ಸ್ಮರಣೀಯವಾಗಿ ಆಚರಿಸಲು ಸಾಧ್ಯ. ಆದರೆ ಈಗಿನ ಮಂದಗತಿಯ ಸಿದ್ಧತೆಗಳನ್ನು ನೋಡಿದರೆ, ಇದು ಐದು ಕೋಟಿಯ ಉತ್ಸವದಂತೆ ಕಾಣುತ್ತಿಲ್ಲ ಹಾಗೂ ಜಿಲ್ಲಾಡಳಿತಕ್ಕೆ ಉತ್ಸವದ ಬಗ್ಗೆ ಆಸಕ್ತಿಯೇ ಇಲ್ಲ ಎಂಬುದು ಜನರ ನೇರ ಆರೋಪವಾಗಿದೆ.
ಜನರ ಆಗ್ರಹ: ಇನ್ನುಳಿದ ಕೆಲವೇ ದಿನಗಳಲ್ಲಾದರೂ ಜಿಲ್ಲಾಡಳಿತ ಎಚ್ಚೆತ್ತುಕೊಂಡು, ತಕ್ಷಣವೇ ಸಭೆಗಳನ್ನು ನಡೆಸಬೇಕು. ಊರಿನ ಸ್ವಚ್ಛತೆ, ಕೋಟೆಯ ನವೀಕರಣ ಹಾಗೂ ಜನರಿಗೆ ಬೇಕಾದ ನೀರು, ಉಪಹಾರ ಮತ್ತು ಮೂಲಭೂತ ಸೌಕರ್ಯಗಳನ್ನು ತುರ್ತಾಗಿ ಕಲ್ಪಿಸಿ, ಉತ್ಸವವನ್ನು ಕಿತ್ತೂರಿನ ಐತಿಹಾಸಿಕ ಹಿನ್ನೆಲೆಗೆ ತಕ್ಕಂತೆ ಅತ್ಯಂತ ವಿಜೃಂಭಣೆಯಿಂದ ನಡೆಸಿಕೊಡಬೇಕೆಂಬುದು ಸಮಸ್ತ ಕಿತ್ತೂರು ಜನತೆಯ ಕಳಕಳಿಯ ಆಗ್ರಹವಾಗಿದೆ.
