ಹುಬ್ಬಳ್ಳಿ : ಕಠಿಣ ಶಸ್ತ್ರಚಿಕಿತ್ಸೆಯೊಂದರಲ್ಲಿ ಎದುರಾದ ವೈದ್ಯಕೀಯ ಸವಾಲಿಗೆ ಪರಿಹಾರ ಕಂಡುಕೊಳ್ಳುವ ಪ್ರಯತ್ನವು ಇದೀಗ ಮಹತ್ವದ ವೈದ್ಯಕೀಯ ಆವಿಷ್ಕಾರವಾಗಿ ರೂಪುಗೊಂಡಿದೆ. ಸಾಕ್ರಾ ವರ್ಲ್ಡ್ ಹಾಸ್ಪಿಟಲ್‌ನ ಆರ್ಥೋಪೆಡಿಕ್ಸ್ ವಿಭಾಗದ ಹೆಚ್ಚುವರಿ ನಿರ್ದೇಶಕ ಡಾ. ಬನಾರ್ಜಿ ಬಿ.ಎಚ್. ಅವರು ಅಭಿವೃದ್ಧಿಪಡಿಸಿರುವ ‘ಅಪರೇಟಸ್ ಫಾರ್ ಟ್ರಾನ್ಸ್-ಒಸಿಯಸ್ ರೋಟೇಟರ್ ಕಫ್ ರಿಪೇರ್’ ಎಂಬ ನವೀನ ಸಾಧನಕ್ಕೆ ಭಾರತೀಯ ಪೇಟೆಂಟ್ ಮಂಜೂರಾಗಿದೆ.
ರೋಟೇಟರ್ ಕಫ್ ರಿಪೇರ್ ಸಂದರ್ಭದಲ್ಲಿ ಸಾಮಾನ್ಯವಾಗಿ ಬಳಸಲಾಗುವ ಸ್ಯೂಚರ್ ಆಂಕರ್‌ಗಳಿಗೆ ಪರ್ಯಾಯವಾಗಿ, ಮೂಳೆಯೊಳಗೆ ಟನಲ್‌ಗಳನ್ನು ಸೃಷ್ಟಿಸಿ ಅವುಗಳ ಮೂಲಕ ಟೆಂಡನ್ ಮರುಜೋಡಿಸಲು ನೆರವಾಗುತ್ತದೆ. ವಿಶೇಷವಾಗಿ ಮೂಳೆಯ ಗುಣಮಟ್ಟ ಕಡಿಮೆಯಾಗಿರುವ ರೋಗಿಗಳಲ್ಲಿ, ಸಾಂಪ್ರದಾಯಿಕ ಆಂಕರ್‌ಗಳಿಂದ ಅಗತ್ಯವಿರುವಷ್ಟು ಬಲವಾದ ಫಿಕ್ಸೇಷನ್ ಸಾಧಿಸಲು ಕಷ್ಟವಾಗುವ ಸಂದರ್ಭಗಳಲ್ಲಿ ಈ ವಿಧಾನ ಉಪಯುಕ್ತವಾಗುವ ಸಾಧ್ಯತೆ ಇದೆ.
ವಯೋವೃದ್ಧರು ಹಾಗೂ ಆಸ್ಟಿಯೋಪೊರೋಸಿಸ್‌ನಂತಹ ಸಮಸ್ಯೆಗಳಿಂದ ಮೂಳೆಯ ಬಲ ಕಡಿಮೆಯಾಗಿರುವ ರೋಗಿಗಳಲ್ಲಿ ಇಂತಹ ಸವಾಲು ಹೆಚ್ಚು ಎದುರಾಗಬಹುದು. ಈ ಹಿನ್ನೆಲೆಯಲ್ಲಿ, ಸಾಂಪ್ರದಾಯಿಕ ಸ್ಯೂಚರ್ ಆಂಕರ್ ಆಧಾರಿತ ವಿಧಾನಕ್ಕೆ ಪರ್ಯಾಯ ಆಯ್ಕೆ ಒದಗಿಸುವ ಉದ್ದೇಶದಿಂದ ಈ ಸಾಧನ ಅಭಿವೃದ್ಧಿಪಡಿಸಲಾಗಿದೆ.
ಕಠಿಣ ಶಸ್ತ್ರಚಿಕಿತ್ಸೆಯ ಅನುಭವದಿಂದ ಹುಟ್ಟಿದ ಪರಿಕಲ್ಪನೆ
ಈ ನವೀನ ಸಾಧನದ ಪರಿಕಲ್ಪನೆ ಮೂಳೆಯ ಗುಣಮಟ್ಟ ಕಡಿಮೆಯಾಗಿದ್ದ ರೋಗಿಯೊಬ್ಬರಿಗೆ ನಡೆಸಿದ ಕಠಿಣ ರೋಟೇಟರ್ ಕಫ್ ರಿಪೇರ್ ಶಸ್ತ್ರಚಿಕಿತ್ಸೆ ಸಂದರ್ಭದಲ್ಲಿ ಮೂಡಿತು. ಸಾಂಪ್ರದಾಯಿಕ ಆಂಕರ್ ಫಿಕ್ಸೇಷನ್‌ಗೆ ಅಗತ್ಯವಿರುವಷ್ಟು ಬಲವಾದ ಹಿಡಿತ ಮೂಳೆಯಲ್ಲಿ ದೊರೆಯುತ್ತಿಲ್ಲ ಎಂಬುದನ್ನು ಡಾ. ಬನಾರ್ಜಿ ಗಮನಿಸಿದರು. ಇಂತಹ ಪರಿಸ್ಥಿತಿಯಲ್ಲಿ ರಿಪೇರ್‌ನ ಗುಣಮಟ್ಟದಲ್ಲಿ ರಾಜಿ ಮಾಡಿಕೊಳ್ಳುವ ಬದಲು, ಟೆಂಡನ್ ನ್ನು ಮೂಳೆಯ ಮೂಲಕವೇ ಭದ್ರಪಡಿಸುವ ಪರ್ಯಾಯ ವಿಧಾನವನ್ನು ಅವರು ಕಂಡುಕೊಂಡರು. ಈ ಪ್ರಯತ್ನ ಯಶಸ್ವಿಯಾದ ಬಳಿಕ, ಇದೇ ವಿಧಾನವನ್ನು ಹೆಚ್ಚು ಪರಿಣಾಮಕಾರಿಯಾಗಿ ಮತ್ತು ಸುಲಭವಾಗಿ ಅನುಸರಿಸಲು ನೆರವಾಗುವ ವಿಶೇಷ ಸಾಧನ ಅಭಿವೃದ್ಧಿಪಡಿಸುವ ಆಲೋಚನೆ ಮೂಡಿತು.
ಆರಂಭಿಕ ಪರಿಕಲ್ಪನೆಯನ್ನು ಪ್ರಾಯೋಗಿಕ ಸಾಧನವಾಗಿ ರೂಪಿಸುವ ಕಾರ್ಯವನ್ನು ಡಾ. ಬನಾರ್ಜಿ ಅವರು ಸುಮಾರು ಮೂರರಿಂದ ನಾಲ್ಕು ವರ್ಷಗಳ ಕಾಲ ಮುಂದುವರಿಸಿದರು. ತಮ್ಮ ದೀರ್ಘಕಾಲದ ಶಸ್ತ್ರಚಿಕಿತ್ಸಾ ಅನುಭವ, ಕ್ಲಿನಿಕಲ್ ಗಮನಿಕೆಗಳು ಹಾಗೂ ಶಸ್ತ್ರಚಿಕಿತ್ಸೆ ಸಂದರ್ಭದಲ್ಲಿ ಎದುರಾದ ಪ್ರಾಯೋಗಿಕ ಸವಾಲುಗಳನ್ನು ಆಧಾರವಾಗಿಸಿಕೊಂಡು ಸಾಧನದ ವಿನ್ಯಾಸವನ್ನು ಅಭಿವೃದ್ಧಿಪಡಿಸಿ, ಹಲವು ಹಂತಗಳಲ್ಲಿ ಪರಿಷ್ಕರಿಸಿದರು.
ಸಾಮಾನ್ಯ ರೋಟೇಟರ್ ಕಫ್ ರಿಪೇರ್ ಶಸ್ತ್ರಚಿಕಿತ್ಸೆಯಲ್ಲಿ ಹರಿದಿರುವ ಟೆಂಡನ್ ಅನ್ನು ಅದರ ಮೂಲ ಅಟ್ಯಾಚ್‌ಮೆಂಟ್ ಸೈಟ್‌ಗೆ ಮರುಜೋಡಿಸಲು ಮೂಳೆಯಲ್ಲಿ ಸ್ಯೂಚರ್ ಆಂಕರ್‌ಗಳನ್ನು ಅಳವಡಿಸಲಾಗುತ್ತದೆ. ಆದರೆ ಮೂಳೆಯ ಗುಣಮಟ್ಟ ದುರ್ಬಲವಾಗಿರುವ ಸಂದರ್ಭಗಳಲ್ಲಿ ಈ ಆಂಕರ್‌ಗಳು ಅಗತ್ಯವಿರುವಷ್ಟು ದೃಢವಾದ ಫಿಕ್ಸೇಷನ್ ಒದಗಿಸಲು ವಿಫಲವಾಗಬಹುದು. ಇದರಿಂದ ಟೆಂಡನ್ ರಿಪೇರ್ ಪ್ರಕ್ರಿಯೆ ಹೆಚ್ಚು ಸಂಕೀರ್ಣವಾಗುವ ಸಾಧ್ಯತೆ ಇದೆ.ಪೇಟೆಂಟ್ ಪಡೆದಿರುವ ಸಾಧನದ ಆವಿಷ್ಕಾರಕ ಹಾಗೂ ಸಾಕ್ರಾ ವರ್ಲ್ಡ್ ಹಾಸ್ಪಿಟಲ್‌ನ ಆರ್ಥೋಪೆಡಿಕ್ಸ್ ವಿಭಾಗದ ಹೆಚ್ಚುವರಿ ನಿರ್ದೇಶಕ ಡಾ. ಬನಾರ್ಜಿ ಬಿ.ಎಚ್. ಮಾತನಾಡಿ, ಈ ಸಾಧನಕ್ಕೆ ಪೇಟೆಂಟ್ ದೊರೆತಿರುವುದು ನನ್ನ ಪಾಲಿಗೆ ಮಹತ್ವದ ಮೈಲಿಗಲ್ಲು. ವಿಶೇಷವಾಗಿ ಮೂಳೆಯ ಗುಣಮಟ್ಟ ಕಡಿಮೆಯಾಗಿರುವ ಕಾರಣ ಸಾಂಪ್ರದಾಯಿಕ ಆಂಕರ್ ಆಧಾರಿತ ರಿಪೇರ್ ಕಷ್ಟಕರವಾಗುವ ಸಂದರ್ಭಗಳಲ್ಲಿ ಶಸ್ತ್ರಚಿಕಿತ್ಸಕರಿಗೆ ಮತ್ತೊಂದು ಆಯ್ಕೆ ಒದಗಿಸುವುದು ನನ್ನ ಉದ್ದೇಶ. ಜತೆಗೆ ಆರ್ಥೋಪೆಡಿಕ್ ಶಸ್ತ್ರಚಿಕಿತ್ಸೆಯಲ್ಲಿ ದೇಶೀಯ ವೈದ್ಯಕೀಯ ಆವಿಷ್ಕಾರಕ್ಕೆ ಕೊಡುಗೆ ನೀಡಲು ಬಯಸುತ್ತೇನೆ” ಎಂದು ಅವರು ತಿಳಿಸಿದರು.
