ಹಸಿರು ಕ್ರಾಂತಿ ವರದಿ ಬೆಳಗಾವಿ
1980ರಿಂದ ನೇತ್ರಚಿಕಿತ್ಸಾ ಸೇವೆ ಸಲ್ಲಿಸುತ್ತಿರುವ ನಂದಾದೀಪ ಕಣ್ಣಿನ ಆಸ್ಪತ್ರೆಯ ವೈದ್ಯಕೀಯ ನಿರ್ದೇಶಕ ಡಾ.ಸೌರಭ್ ಪಟವರ್ಧನ್ ಅವರಿಗೆ ಮಹಾರಾಷ್ಟ್ರ ನೇತ್ರವಿಜ್ಞಾನ ಸಂಘದ ವಾರ್ಷಿಕ ಸಮ್ಮೇಳನ ಎಂಒಎಸ್‌ಕಾನ್-2026ರಲ್ಲಿ ಪ್ರತಿಷ್ಠಿತ ಅತ್ಯುತ್ತಮ ಸಂಶೋಧನಾ ಪ್ರಬಂಧ ಮತ್ತು ಆವಿಷ್ಕಾರ ಪ್ರಶಸ್ತಿ ಲಭಿಸಿದೆ.
ಕಣ್ಣಿನ ಪೊರೆ ಶಸ್ತ್ರಚಿಕಿತ್ಸೆಯಲ್ಲಿ ಪ್ರಮುಖವಾಗಿರುವ ಆಂಗಲ್ ಆಲ್ಫಾ ಅಳತೆಗಾಗಿ ಅವರು ಅಭಿವೃದ್ಧಿಪಡಿಸಿರುವ ಆಂಗಲ್ ಆಲ್ಫಾ ಪಟವರ್ಧನ್ ಎಂಬ ಸ್ಮಾರ್ಟ್‌ಫೋನ್ ಆ್ಯಪ್ ಕುರಿತ ಸಂಶೋಧನಾ ಪ್ರಬಂಧಕ್ಕೆ ಈ ಪ್ರಶಸ್ತಿ ಲಭಿಸಿದೆ.
ದುಬಾರಿ ಐಒಎಲ್ ಮಾಸ್ಟರ್ 700 ಸಾಧನದ ಮೂಲಕ ಅಳೆಯುವ ಆಂಗಲ್ ಆಲ್ಫಾ ಪ್ರಮಾಣವನ್ನು ಮೊಬೈಲ್ ಆ್ಯಪ್ ಮೂಲಕವೂ ಅಳೆಯಬಹುದೆಂಬುದನ್ನು ಸಂಶೋಧನೆ ತೋರಿಸಿದೆ. ಇದರಿಂದ ಕಡಿಮೆ ವೆಚ್ಚದಲ್ಲಿ ನೇತ್ರತಜ್ಞರಿಗೆ ಈ ತಂತ್ರಜ್ಞಾನ ಲಭ್ಯವಾಗುವ ನಿರೀಕ್ಷೆಯಿದೆ.
ಗಮನ, ದೂರದೃಷ್ಟಿ ಮತ್ತು ಭವಿಷ್ಯ ಎಂಬ ಆಶಯದೊಂದಿಗೆ ನಡೆದ ಸಮ್ಮೇಳನದಲ್ಲಿ 3,000ಕ್ಕೂ ಅಧಿಕ ನೇತ್ರ ಶಸ್ತ್ರಚಿಕಿತ್ಸಕರು ಪಾಲ್ಗೊಂಡಿದ್ದರು. ಆಸ್ಪತ್ರೆಯ ಈ ಸಾಧನೆಗೆ ವೈದ್ಯಕೀಯ ಕ್ಷೇತ್ರದ ಗಣ್ಯರು ಅಭಿನಂದನೆ ಸಲ್ಲಿಸಿದ್ದಾರೆ.
