ಅಥಣಿ: ಅಥಣಿಯ ಮೆಟ್ರಿಕ್ ನಂತರ ಬಾಲಕಿಯರ ವಸತಿ ನಿಲಯ ಭಾಗ ೧ ರ ವಸತಿ ನಿಲಯದಲ್ಲಿ ಸೋಮವಾರದಂದು ಮಕ್ಕಳ ದಿನಾಚರಣೆಯನ್ನು ಸಂಭ್ರಮದಿಂದ ಆಚರಿಸಲಾಯಿತು.
ಮುಖ್ಯ ಅತಿಥಿಯಾಗಿ ಸಾಹಿತಿ ಶಿಕ್ಷಕಿ ರೋಹಿಣಿ ಯಾದವಾಡ ಅವರು ಆಗಮಿಸಿ ಮಕ್ಕಳ ದಿನಾಚರಣೆ ಆಚರಣೆಯ ಮಹತ್ವ ಕುರಿತು ಮಾತನಾಡುತ್ತ ಮಕ್ಕಳಲ್ಲಿ ಇಂದು ಸಹಜ ಮುಗ್ಧತೆ ಕಳೆದುಕೊಂಡು ಕೃತಕ ಪ್ರಬುದ್ಧತೆಯನ್ನು ಕಾಣುತ್ತಿದ್ದೆವೆ. ನಮ್ಮ ಸಂಸ್ಕ್ರತಿಯನ್ನು ಮರೆತು ಗಾಜಿನ ಪರದೆಯ ಹಿಂದೆ ( ಮೊಬೈಲ್ ನಲ್ಲಿ) ಕಳೆದು ಹೋಗುತ್ತಿದ್ದಾರೆ. ಆಧುನಿಕ ಯುಗದಲ್ಲಿ ಮಕ್ಕಳು ಆತ್ಮವಿಶ್ವಾಸ, ವಿವಿಧ ಕೌಶಲ್ಯಗಳನ್ನು ಹೊಂದುವುದು ಮುಖ್ಯವಾಗಿದೆ ಎಂದು ಹೇಳುತ್ತ, ಎಷ್ಟೇ ಆದುನಿಕ ತಂತ್ರಜ್ಞಾನ ಬಂದರೂ ಮನುಷ್ಯನ ಬುದ್ಧಿವಂತಿಕೆಯ ಮೇಲೆ ಅದು ನಿರ್ಮಾಣಗೊಂಡಿರುವುದು ಎಂಬುದು ತಿಳಿದಿರಬೇಕು. ಹೀಗಾಗಿ ಮಾನವನ ಬುದ್ಧಿವಂತಿಕೆಗೆ ಸರ್ವಕಾಲಕ್ಕೂ ಬೆಲೆ ಇದೆ ಎಂದು ಹೇಳಿದರು.
ನಿಲಯ ಪಾಲಕರಾದ ಪಾರ್ವತಿ ಮಲಗೌಡರ ಮಾತನಾಡಿ ಮಕ್ಕಳು ಶಿಸ್ತು, ಶೃದ್ಧೆಯಿಂದ ತಾವಿಟ್ಟುಕೊಂಡ ಗುರಿಯನ್ನು ಮುಟ್ಟಲು ಸತತ ಪರಿಶ್ರಮಿಗಳಾಗಬೇಕೆಂದರು. ವಿದ್ಯಾರ್ಥಿನಿ ಪ್ರತೀಕ್ಷಾ ತೀರ್ಥ ಚಾಚಾ ನೆಹರು ಅವರ ಬಗ್ಗೆ ಭಾಷಣ ಮಾಡಿದಳು.
ಅಧ್ಯಕ್ಷತೆಯನ್ನು ಹಿಂದುಳಿದ ವರ್ಗಗಳ ಕಲ್ಯಾಣಾಧಿಕಾರಿಗಳಾದ ವೆಂಕಟೇಶ ಕುಲಕರ್ಣಿ ಅವರು ವಹಿಸಿ ಮಕ್ಕಳು ಪಠ್ಯದೊಂದಿಗೆ ಪಠ್ಯೇತರವಾಗಿಯೂ ಆಸಕ್ತಿಯನ್ನು ಬೆಳೆಸಿಕೊಂಡು ಸರ್ವತೋಮುಖವಾಗಿ ಬೆಳೆಯಬೇಕೆಂದರು.
ಈ ಸಮಯದಲ್ಲಿ ಸ್ಪರ್ಧಾವಿಜೇತರಿಗೆ ಬಹುಮಾನ ವಿತರಿಸಲಾಯಿತು. ಪ್ರಾರಂಭದಲ್ಲಿ ನೆಹರು ಅವರ ಭಾವಚಿತ್ರಕ್ಕೆ ಪೂಜೆಸಲ್ಲಿಸುವುದರೊಂದಿಗೆ ಕೇಕ್ ಕತ್ತರಿಸಲಾಯಿತು.
ಈ ಸಂದರ್ಭದಲ್ಲಿ ಲಕ್ಷ್ಮಿ ಎಣ್ಣಿ, ಲಕ್ಷ್ಮಿ ಕಟ್ಟಿ, ರಾಜೇಶ್ವರಿ ತೋಡಕರ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.
ಕುಮಾರಿ ಭಾಗ್ಯಶ್ರೀ ಮಾಳಗೊಂಡ ಸ್ವಾಗತಿಸಿದರು . ಕುಮಾರಿ ಸವಿತಾ ತಾಂವಶಿ ಕಾರ್ಯಕ್ರಮ ನಿರೂಪಿಸಿದರು.