ಚ ಕಿತ್ತೂರು: ಪಟ್ಟಣ ಪಂಚಾಯಿತಿ ವ್ಯಾಪ್ತಿಯಲ್ಲಿ ಮುಖ್ಯಮಂತ್ರಿಗಳ ನಗರಾಭಿವೃದ್ಧಿ ಯೋಜನೆ ಅಡಿಯಲ್ಲಿ ಕೈಗೆತ್ತಿಕೊಳ್ಳಲಾಗಿರುವ ಅಭಿವೃದ್ಧಿ ಕಾಮಗಾರಿಗಳನ್ನು ಒಂದೇ ದೊಡ್ಡ ಪ್ಯಾಕೇಜ್ನಲ್ಲಿ ಟೆಂಡರ್ ಕರೆಯದಂತೆ ಹಾಗು ಮೀಸಲಾತಿಯನ್ನು ಕೈಬಿಡದಂತೆ ಸ್ಥಳೀಯ ಗುತ್ತಿಗೆದಾರರ ಸಂಘ ಮನವಿ ಮಾಡಿದೆ.
ಕಿತ್ತೂರು ಪಟ್ಟಣ ಪಂಚಾಯಿತಿ ವ್ಯಾಪ್ತಿಯ ₹3.25 ಕೋಟಿ ಹಾಗೂ ಎಂ.ಕೆ. ಹುಬ್ಬಳ್ಳಿಯ 4.25 ಕೋಟಿ ಮೊತ್ತದ ಎಲ್ಲ ಅಭಿವೃದ್ಧಿ ಕಾಮಗಾರಿಗಳಿಗೆ ಸಣ್ಣ ಮಟ್ಟದ ವಿಂಗಡಣೆ ಮಾಡದೇ, ಒಟ್ಟಾಗಿ ಬೃಹತ್ ಪ್ಯಾಕೇಜ್ ಟೆಂಡರ್ ಕರೆಯಲಾಗಿದೆ. ಈ ನಿರ್ಧಾರದಿಂದಾಗಿ ಹೊರಗಿನ ದೊಡ್ಡ ದೊಡ್ಡ ಗುತ್ತಿಗೆದಾರರಿಗೆ ಅನುಕೂಲವಾಗಲಿದ್ದು, ಸ್ಥಳೀಯ ಕಾಮಗಾರಿ ನಂಬಿಕೊಂಡಿರುವ ಸಣ್ಣ ಗುತ್ತಿಗೆದಾರರಿಗೆ ಹಾಗೂ ಕಾರ್ಮಿಕರಿಗೆ ತೀವ್ರ ಅನ್ಯಾಯವಾಗುತ್ತಿದೆ ಎಂದು ಗುತ್ತಿಗೆದಾರರ ಸಂಘದ ಪದಾಧಿಕಾರಿಗಳು ತಮ್ಮ ಅಳಲು ತೋಡಿಕೊಂಡಿದ್ದಾರೆ.
ಬೃಹತ್ ಮೊತ್ತವನ್ನು ಒಂದೇ ಪ್ಯಾಕೇಜ್ ಮಾಡುವ ಬದಲಿಗೆ ₹20 ಲಕ್ಷದಿಂದ ₹50 ಲಕ್ಷದವರೆಗಿನ ಪ್ರತ್ಯೇಕ (ಸಣ್ಣ) ಟೆಂಡರ್ಗಳನ್ನು ಕರೆಯಬೇಕು. ಹೀಗೆ ಮಾಡುವುದರಿಂದ ಸ್ಥಳೀಯ ಸಣ್ಣ ಗುತ್ತಿಗೆದಾರರಿಗೆ ಕೆಲಸ ದೊರೆಯಲು ಸಾಧ್ಯವಾಗುತ್ತದೆ. ಕಾಮಗಾರಿಗಳನ್ನು ಒಂದೇ ಪ್ಯಾಕೇಜ್ ಮಾಡುವುದರಿಂದ ನಿಯಮಾನುಸಾರ ನಡೆಯಬೇಕಾದ ರಾಂಡಮೈಸೇಷನ್ ಪ್ರಕ್ರಿಯೆಗೆ ಅಡಚಣೆಯಾಗಲಿದ್ದು, ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ಗುತ್ತಿಗೆದಾರರಿಗೂ ದೊರೆಯಬೇಕಾದ ಅವಕಾಶಗಳು ಕೈತಪ್ಪುತ್ತಿವೆ.
ಹೊರಗಿನಿಂದ ಬರುವ ದೊಡ್ಡ ಗುತ್ತಿಗೆದಾರರು ತಮ್ಮದೇ ಆದ ಲೇಬರ್ ಹಾಗೂ ಮೇಸ್ತ್ರಿಗಳನ್ನು ಕರೆತರುತ್ತಾರೆ. ಇದರಿಂದ ಸ್ಥಳೀಯ ಸೆಂಟ್ರಿಂಗ್, ಗೌಂಡಿ ಮೇಸ್ತ್ರಿಗಳು ಹಾಗೂ ದಿನಗೂಲಿ ಕಾರ್ಮಿಕರು ಕೆಲಸವಿಲ್ಲದೆ ಸಂಕಷ್ಟಕ್ಕೆ ಸಿಲುಕುವ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ತಿಳಿಸಿದ್ದಾರೆ.
ಸ್ಥಳೀಯ ಸಣ್ಣ ಗುತ್ತಿಗೆದಾರರ ಹಿತದೃಷ್ಟಿಯಿಂದ ಪೌರಾಡಳಿತ ಸಚಿವರು ಹಾಗೂ ಹಿರಿಯ ಅಧಿಕಾರಿಗಳು ತಕ್ಷಣ ಈ ಪ್ಯಾಕೇಜ್ ವ್ಯವಸ್ಥೆಯನ್ನು ರದ್ದುಪಡಿಸಿ, ಸಣ್ಣ ಕಾಮಗಾರಿಗಳಾಗಿ ಟೆಂಡರ್ ಕರೆಯಬೇಕು ಎಂದು ಗುತ್ತಿಗೆದಾರರ ಸಂಘ ಒತ್ತಾಯಿಸಿದೆ.
ಈ ಸಂದರ್ಭದಲ್ಲಿ ಗುತ್ತಿಗೆದಾರರ ಸಂಘದ ಅಧ್ಯಕ್ಷ ಬಾಬು ಮಲ್ಲಾಪುರಕರ, ಮಾರುತಿ ಕಲ್ಲವಡ್ಡರ, ರಾಜು ಜಾಂಗಟಿ, ಮಡಿವಾಳಿ ಒಕ್ಕುಂದ, ಅಬ್ಬಾಸ ಅಲಿ ಕಾಶೀಮನವರ, ಶಿವಯೋಗಿ ದೊಡಮನಿ, ಬಾಬು ಹುಲಮನಿ,ಸುರೇಶ ಜಾಂಗಟಿ ಹಾಗು ಇತರರು ಉಪಸ್ಥಿತರಿದ್ದರು.
