ತಾಳಿಕೋಟೆ: ಮಹಾಲಕ್ಷ್ಮಿ ಎಂದರೆ ಕೇವಲ ಸಂಪತ್ತಿನ ಅಧಿದೇವತೆಯಲ್ಲ; ದುಷ್ಟಶಕ್ತಿಗಳನ್ನು ನಾಶಮಾಡಿ ಧರ್ಮವನ್ನು ಸ್ಥಾಪಿಸುವ ಮಹಾಶಕ್ತಿಯೂ ಹೌದು.ತಾಯಿ ಮಹಾಲಕ್ಷ್ಮಿಯ ದಿವ್ಯರೂಪವು ಅತ್ಯಂತ ತೇಜಸ್ವಿಯಾಗಿತ್ತು. ಅನೇಕ ಕೈಗಳಲ್ಲಿ ವಿವಿಧ ಆಯುಧಗಳನ್ನು ಧರಿಸಿದ್ದ ದೇವಿಯು ಸಿಂಹದ ಮೇಲೆ ಆರೂಢಳಾಗಿ ಯುದ್ಧಭೂಮಿಗೆ ಆಗಮಿಸಿ ಮಹಿಷಾಸೂರನನ್ನು ಸಂಹರಿಸಲು ಸಿದ್ಧಳಾದಳೆಂದು ಖ್ಯಾತಪ್ರವಚನಕಾರರಾದ ಯಾದಗಿರಿಯ ಬಸಯ್ಯ ಶಾಸ್ತ್ರೀಗಳು ನುಡಿದರು .
ಗುರುವಾರರಂದು ಸ್ಥಳೀಯ ಎಸ.ಕೆ.ನಗರದಲ್ಲಿ ಬನ್ನಿಮಹಾಂಕಾಳಿ ದೇವಸ್ಥಾನದಲ್ಲಿ ನವರಾತ್ರಿ ಉತ್ಸವ ಅಂಗವಾಗಿ ಏರ್ಪಡಿಸಲಾದ ಶ್ರೀ ದೇವಿ ಪುರಾಣ ಪ್ರಾರಂಭೋತ್ಸವದ ೫ನೇ ದಿನದಂದು ಪುರಾಣ ಮುಂದುವರಿಸಿ ಮಾತನಾಡುತ್ತಿದ್ದ ಅವರು ದೇವಿ ಪುರಾಣದ ರಣಭೂಮಿ ಪ್ರಸಂಗವನ್ನು ವಿವರಿಸಿದ ಅವರು ದೇವಿಯ ಸಿಂಹದ ಘರ್ಜನೆ ದಿಕ್ಕು-ದಿಕ್ಕುಗಳಲ್ಲಿಯೂ ಮೊಳಗಿತು. ದೇವಿಯ ದಿವ್ಯನಾದದಿಂದ ಭೂಮಿ, ಆಕಾಶ ಮತ್ತು ಪಾತಾಳಗಳೂ ಕಂಪಿಸಿದವು ಎಂದು ಪುರಾಣಕಥೆ ವರ್ಣಿಸುತ್ತದೆ ಎಂದರು.
ಮಹಿಷಾಸುರನಿಗೆ ದೇವಿಯ ಆಗಮನದ ಸುದ್ದಿ ತಲುಪಿತು. ಅವನು ಆಶ್ಚರ್ಯದಿಂದ, ?ನನ್ನನ್ನು ಎದುರಿಸಲು ಬಂದಿರುವ ಈ ಸ್ತ್ರೀ ಯಾರು? ದೇವತೆಗಳೆಲ್ಲ ನನ್ನ ಮುಂದೆ ಸೋತಿದ್ದಾರೆ. ಇವಳಿಂದ ನನಗೆ ಯಾವ ಅಪಾಯವೂ ಇಲ್ಲ? ಎಂದು ಅಹಂಕಾರದಿಂದ ನಕ್ಕನು.ಆದರೆ ದೇವಿಯ ದಿವ್ಯಶಕ್ತಿಯ ನಿಜಸ್ವರೂಪವನ್ನು ಅವನು ಅರಿತಿರಲಿಲ್ಲ.ದೇವಿಯು ಮಹಿಷಾಸುರನಿಗೆ ಧರ್ಮದ ಮಾರ್ಗವನ್ನು ಅನುಸರಿಸುವಂತೆ ಎಚ್ಚರಿಕೆ ನೀಡಿದಳು. ಆದರೆ ಅಹಂಕಾರದಿಂದ ಕುರುಡನಾಗಿದ್ದ ಮಹಿಷಾಸುರನು ಆ ಎಚ್ಚರಿಕೆಯನ್ನು ನಿರ್ಲಕ್ಷಿಸಿದನು.
ಅವನು ತನ್ನ ಸೇನೆಯನ್ನು ದೇವಿಯ ಮೇಲೆ ದಾಳಿ ಮಾಡಲು ಕಳುಹಿಸಿದನು.ದೇವಿಯು ತನ್ನ ತ್ರಿಶೂಲ, ಚಕ್ರ, ಬಾಣ ಮತ್ತು ಇತರ ಆಯುಧಗಳಿಂದ ಅಸುರರ ಸೇನೆಯನ್ನು ಎದುರಿಸಿದಳು. ಸಿಂಹವು ತನ್ನ ಶೌರ್ಯದಿಂದ ಅಸುರರ ಸೇನೆಯನ್ನು ಚದುರಿಸಿತು.
ಯುದ್ಧಭೂಮಿಯಲ್ಲಿ ಭೀಕರ ಹೋರಾಟ ನಡೆಯಿತು. ಮಹಿಷಾಸುರನ ಸೇನಾಪತಿಗಳು ದೇವಿಯನ್ನು ಸೋಲಿಸಲು ಅನೇಕ ರೀತಿಯ ಪ್ರಯತ್ನಗಳನ್ನು ಮಾಡಿದರು. ಆದರೆ ದೇವಿಯ ದಿವ್ಯಶಕ್ತಿಯ ಮುಂದೆ ಅವರ ಪ್ರಯತ್ನಗಳೆಲ್ಲ ವಿಫಲವಾದವು.ದೇವಿಯು ಅಸುರರ ದಾಳಿಯನ್ನು ತಡೆದು, ಅವರನ್ನು ಒಬ್ಬೊಬ್ಬರಾಗಿ ಸೋಲಿಸುತ್ತಾ ಮುನ್ನಡೆದಳು.ಮಹಿಷಾಸುರನಿಗೆ ತನ್ನ ಸೇನೆ ನಾಶವಾಗುತ್ತಿರುವುದನ್ನು ಕಂಡು ಕೋಪ ಹೆಚ್ಚಾಯಿತು. ಕೊನೆಗೆ ಅವನೇ ಯುದ್ಧಭೂಮಿಗೆ ಇಳಿದನು.
ಮಹಿಷಾಸುರನ ರೂಪಾಂತರಗಳು ಮತ್ತು ಭೀಕರ ಯುದ್ಧ, ಮಹಿಷಾಸುರನಿಗೆ ರೂಪ ಬದಲಾಯಿಸುವ ಶಕ್ತಿ ಇತ್ತು. ಅವನು ಕೆಲವೊಮ್ಮೆ ಭೀಕರವಾದ ಎಮ್ಮೆಯ ರೂಪವನ್ನು, ಕೆಲವೊಮ್ಮೆ ಸಿಂಹದ ರೂಪವನ್ನು, ಮತ್ತೊಮ್ಮೆ ಮಾನವ ರೂಪವನ್ನು ಧರಿಸಿ ದೇವಿಯೊಂದಿಗೆ ಯುದ್ಧ ಮಾಡಿದನೆಂದು ದೇವಿ ಮಹಾತ್ಮ್ಯದಲ್ಲಿ ವಿವರಿಸಲಾಗಿದೆ. ಎಮ್ಮೆಯ ರೂಪವನ್ನು ಧರಿಸಿದ ಮಹಿಷಾಸುರನು ತನ್ನ ಕೊಂಬುಗಳಿಂದ ಪರ್ವತಗಳನ್ನು ಎತ್ತಿ ಎಸೆಯುವಂತೆ, ತನ್ನ ಗೊರಸುಗಳಿಂದ ಭೂಮಿಯನ್ನು ಅಗೆದು ಹಾಕುವಂತೆ, ತನ್ನ ಬಾಲದಿಂದ ಶತ್ರುಗಳನ್ನು ಹೊಡೆದುರುಳಿಸುವಂತೆ ಭೀಕರವಾಗಿ ಹೋರಾಡಿದನು ಎಂಬುದು ಪುರಾಣದ ವರ್ಣನೆ ಶಾಸ್ತ್ರೀಗಳು ನುಡಿದರು.
ಮಹುಷಾಸೂರನ ಗರ್ಜನೆಯಿಂದ ಯುದ್ಧಭೂಮಿಯೇ ನಡುಗಿತು.ಆದರೆ ಮಹಾಲಕ್ಷ್ಮಿಯು ಧೈರ್ಯವನ್ನು ಕಳೆದುಕೊಳ್ಳಲಿಲ್ಲ. ಅವಳು ತನ್ನ ಸಿಂಹದ ಮೇಲೆ ಕುಳಿತು ಮಹಿಷಾಸುರನ ಪ್ರತಿಯೊಂದು ದಾಳಿಗೂ ತಕ್ಕ ಉತ್ತರ ನೀಡಿದಳು.ಮಹಿಷಾಸುರನು ತನ್ನ ಮಾಯಾಶಕ್ತಿಯನ್ನು ಬಳಸಿದರೂ ದೇವಿಯನ್ನು ಸೋಲಿಸಲು ಸಾಧ್ಯವಾಗಲಿಲ್ಲ.
ಯುದ್ಧವು ಬಹುಕಾಲ ಮುಂದುವರಿಯಿತು. ಮಹಿಷಾಸುರನು ಎಮ್ಮೆಯ ರೂಪದಿಂದ ಸಿಂಹದ ರೂಪಕ್ಕೆ, ಸಿಂಹದ ರೂಪದಿಂದ ಮಾನವ ರೂಪಕ್ಕೆ, ಮತ್ತೆ ಬೇರೆ ಬೇರೆ ರೂಪಗಳಿಗೆ ಬದಲಾಗುತ್ತಾ ದೇವಿಯ ಮೇಲೆ ದಾಳಿ ಮಾಡಿದನು.ದೇವಿಯು ಅವನ ಪ್ರತಿಯೊಂದು ರೂಪಾಂತರವನ್ನೂ ಎದುರಿಸಿದಳು.ಈ ಯುದ್ಧವು ಕೇವಲ ದೇವತೆ ಮತ್ತು ಅಸುರನ ನಡುವಿನ ಹೋರಾಟವಲ್ಲ. ಇದು ಧರ್ಮ ಮತ್ತು ಅಧರ್ಮದ ನಡುವಿನ ಸಂಘರ್ಷದ ಪ್ರತೀಕವಾಗಿದೆ.ಮಹಿಷಾಸುರನು ಶಕ್ತಿ, ಅಧಿಕಾರ ಮತ್ತು ಅಹಂಕಾರದ ಪ್ರತಿರೂಪವಾಗಿದ್ದರೆ, ಮಹಾಲಕ್ಷ್ಮಿಯು ಧರ್ಮ, ಜ್ಞಾನ, ಧೈರ್ಯ ಮತ್ತು ದೈವಿಕ ನ್ಯಾಯದ ಪ್ರತಿರೂಪವಾಗಿದ್ದಾಳೆ ಎಂಬುದರ ಕುರಿತು ವಿವರಿಸಿದ ಪುರಾಣಿಕರು ಕೊನೆಗೆ ಮಹಿಷಾಸುರನ ಶಕ್ತಿಯು ಕುಂದತೊಡಗಿತು. ದೇವಿಯ ದಿವ್ಯಶಕ್ತಿಯನ್ನು ಎದುರಿಸಲು ಸಾಧ್ಯವಾಗದೆ ಅವನು ದಣಿದನು.
ದೇವಿ ಮಹಾತ್ಮ್ಯದ ಪ್ರಸಿದ್ಧ ವರ್ಣನೆಯ ಪ್ರಕಾರ, ದೇವಿಯು ಮಹಿಷಾಸುರನನ್ನು ತನ್ನ ಪಾದದಡಿ ಅಡಗಿಸಿ, ಅವನು ಎಮ್ಮೆಯ ರೂಪದಿಂದ ಹೊರಬರುತ್ತಿದ್ದಾಗ ಅವನ ಮೇಲೆ ದಾಳಿ ಮಾಡಿದಳು.ದೇವಿಯು ತ್ರಿಶೂಲ ಮತ್ತು ಇತರ ಆಯುಧಗಳ ಸಹಾಯದಿಂದ ಮಹಿಷಾಸುರನನ್ನು ಸಂಹರಿಸಿದಳು ಎಂಬುದರ ಕುರಿತು ಪುರಾಣದ ವಿವರಣೆ ನೀಡಿದ ಶಾಸ್ತ್ರೀಗಳು ಅಧರ್ಮದ ಅಹಂಕಾರವು ಅಂತಿಮವಾಗಿ ದೈವಿಕ ಶಕ್ತಿಯ ಮುಂದೆ ಸೋಲನುಭವಿಸಿತು.
ಮಹಿಷಾಸುರನ ಸಂಹಾರದಿಂದ ದೇವತೆಗಳ ಸಂಕಷ್ಟ ನಿವಾರಣೆಯಾಯಿತು. ಸ್ವರ್ಗಲೋಕವು ಮತ್ತೆ ದೇವತೆಗಳ ವಶಕ್ಕೆ ಮರಳಿತು. ಇಂದ್ರನು ತನ್ನ ಸ್ಥಾನವನ್ನು ಪುನಃ ಪಡೆದುಕೊಂಡನು. ಋಷಿಮುನಿಗಳು ನೆಮ್ಮದಿಯಿಂದ ತಪಸ್ಸು ಮಾಡಲು ಸಾಧ್ಯವಾಯಿತು ಧರ್ಮದ ಮಾರ್ಗದಲ್ಲಿ ನಡೆಯುವವರಿಗೆ ರಕ್ಷಣೆ ದೊರೆಯಿತು.ದೇವತೆಗಳೆಲ್ಲರೂ ತಾಯಿ ಮಹಾಲಕ್ಷ್ಮಿಯನ್ನು ಸ್ತುತಿಸಿ, ?ಜಗನ್ಮಾತೆಯೇ! ನೀನೇ ನಮ್ಮ ರಕ್ಷಕಿ. ನಿನ್ನ ಕೃಪೆಯಿಂದ ಅಧರ್ಮದ ನಾಶವಾಗಿ ಧರ್ಮದ ಸ್ಥಾಪನೆಯಾಗಿದೆ? ಎಂದು ಭಕ್ತಿಯಿಂದ ದೇವಾದಿದೇವತೆಗಳು ಹಾಗೂ ಭಕ್ತ ಸಮೂಹವು ಭಕ್ತಿಯಿಂದ ಶ್ರೀ ಜಗನ್ಮಾತೆಯ ದಿಟ್ಟತನ,ಧೀರತನ ಕುರಿತು ಕೊಡಾಡಿದರೆಂದು ಶಾಸ್ತ್ರೀಗಳು ನುಡಿದರಲ್ಲದೇ ಈ ವಿಜಯದ ಸ್ಮರಣಾರ್ಥವಾಗಿ ದುರ್ಗಾಪೂಜೆ ಮತ್ತು ವಿಜಯದಶಮಿಯಂತಹ ಆಚರಣೆಗಳಲ್ಲಿ ದೇವಿಯ ಮಹಿಷಾಸುರಮರ್ದಿನಿ ರೂಪವನ್ನು ವಿಶೇಷವಾಗಿ ಆರಾಧಿಸುತ್ತಾ ಸಾಗಿ ಬರಲಾಗಿದೆ ಎಂದು ಶಾಸ್ತ್ರೀಗಳು ನುಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶಿವಶರಣೆ ಕಾಶಿಬಾಯಿ ಅವರು ವಹಿಸಿದ್ದರು. ಕುಮಾರಿ ಅಕ್ಷತಾ ಹಾಗೂ ಕುರುಪಾದ ಸರ್ ಅವರು ಸಂಗೀತ ಸೇವೆ ಸಲ್ಲಿಸಿದರು.
ನಿವೃತ್ತ ಶಿಕ್ಷಕರಾದ ಎಸ್.ಎನ್.ಬಸಣ್ಣವರ್ ಸ್ವಾಗತಿಸಿದರು. ಆರ್.ಎಸ್.ಶಿಕಳವಾಡಿ ನಿರೂಪಿಸಿದರು.
