ಕಟಕೋಳ ಸಿದ್ದರಾಯಜ್ಜನವರ ಮಠದಲ್ಲಿ ವೈಭವದ ಜಾತ್ರಾ ಮಹೋತ್ಸವ: ಭಕ್ತ ಸಾಗರ, ಭಂಡಾರದ ನಮನ

ರಾಮದುರ್ಗ: ತಾಲೂಕಿನ ಕಟಕೋಳ ಜೀವಾಪೂರ ರಸ್ತೆಯಲ್ಲಿರುವ ಶ್ರೀ ಸಿದ್ದರಾಯಜ್ಜನವರ ಮಠದಲ್ಲಿ ಪ್ರತಿ ವರ್ಷದಂತೆ ಈ ವರ್ಷವೂ ಸಿದ್ದರಾಯಜ್ಜನವರ ಹಾಗೂ ಯಲ್ಲಪ್ಪಜ್ಜನವರ ಗದ್ದುಗೆಗಳ ದರ್ಶನ ಪಡೆದು, ಭಂಡಾರ ಹಾರಿಸುವ ಮೂಲಕ ಸಾವಿರಾರು ಭಕ್ತರು ತಮ್ಮ ಅಪಾರ ಭಕ್ತಿ, ಶ್ರದ್ಧೆ ಹಾಗೂ ಭಾವೈಕ್ಯತೆಯನ್ನು ಮೆರೆದರು.
ಮುಂಜಾನೆ ಸಿದ್ದರಾಯಜ್ಜನವರ ಹಾಗೂ ಯಲ್ಲಪ್ಪಜ್ಜನವರ ಗದ್ದುಗೆಗಳಿಗೆ ಮಹಾರುದ್ರಾಭಿಷೇಕ ನೆರವೇರಿಸಲಾಯಿತು. ಬಳಿಕ ಅಭಿನವ ಶ್ರೀ ಸಿದ್ದರಾಯಜ್ಜನವರು ವಿಶೇಷ ಪೂಜೆ ಸಲ್ಲಿಸಿ, ಭಕ್ತಿಪೂರ್ವಕವಾಗಿ ಭಂಡಾರ ಅರ್ಪಿಸುವ ಕಾರ್ಯಕ್ರಮ ನಡೆಯಿತು. ಭಕ್ತರು ನಿರಂತರವಾಗಿ ಭಂಡಾರ ಹಾರಿಸುತ್ತ ದೇವರ ದರ್ಶನ ಪಡೆದು ಪುನೀತರಾದರು.
ನೂರಾರು ವಾಲಗ, ಡೊಳ್ಳು ಸೇರಿದಂತೆ ವಿವಿಧ ವಾದ್ಯಗಳ ಮಂಗಳನಾದದೊಂದಿಗೆ ಭಕ್ತರು ಉತ್ಸವದಲ್ಲಿ ಪಾಲ್ಗೊಂಡು ಸಂಭ್ರಮಿಸಿದರು. ಭಕ್ತರು ಭಂಡಾರ ಹಾರಿಸುತ್ತ, ತಮ್ಮ ಇಷ್ಟದೈವಗಳ ಮೇಲಿನ ಅಚಲ ನಂಬಿಕೆ ಹಾಗೂ ಭಕ್ತಿಯನ್ನು ವ್ಯಕ್ತಪಡಿಸಿದರು.
ಉತ್ಸವದ ವಿಶೇಷ ಆಕರ್ಷಣೆಯಾಗಿ ಅಭಿನವ ಶ್ರೀ ಸಿದ್ದರಾಯಜ್ಜನವರು  ವಾಲಗ ಆಡುವುದು, ಸುಡುವ ಹುಗ್ಗಿಯಲ್ಲಿ ಕೈಯಾಡಿಸಿ ಭಕ್ತರಿಗೆ ಪ್ರಸಾದ ನೀಡಿವುದು. ಹಾಗೂ ಸಾವಿರಾರೂ ಭಕ್ತರು ತಮ್ಮ ತಮ್ಮ ಭಕ್ತಿಗನುಸಾರ ಭಂಡಾರ ಹಾರಿಸುವುದು. ಈ ವಿಶಿಷ್ಟ ಧಾರ್ಮಿಕ ಆಚರಣೆಯನ್ನು ಕಣ್ತುಂಬಿಕೊಂಡ ಭಕ್ತರು ಭಕ್ತಿಪರವಶರಾದರು. 
ಭಂಡಾರ ಹಾರಿಸುವುದು, ವಾದ್ಯಗಳ ಮೆರವಣಿಗೆ, ದೇವರ ಜಯಘೋಷ ಹಾಗೂ ಮಹಾಪ್ರಸಾದದ ಮೂಲಕ ಇಡೀ ಪರಿಸರವು ಭಕ್ತಿಮಯವಾಗಿತ್ತು. ಭಕ್ತರ ಅಪಾರ ಸಮಾಗಮದೊಂದಿಗೆ ಧಾರ್ಮಿಕ ಕಾರ್ಯಕ್ರಮವು ಶ್ರದ್ಧೆ, ಸಂಭ್ರಮ ಮತ್ತು ಸೌಹಾರ್ದತೆಯಿಂದ ಜರುಗಿತು.

Also read

ಅಂಗಡಿ-ಮುಂಗಟ್ಟು ಬಂದ್ ಮಾಡಿ ವ್ಯಾಪಾರಿಗಳ ಬೆಂಬಲ; ವಿದ್ಯಾರ್ಥಿಗಳು, ವಿವಿಧ ಸಂಘಟನೆಗಳೂ ರೈತರ ಹೋರಾಟಕ್ಕೆ ಸಾಥ್