ಏಪ್ರಿಲ್ 15 : ತುಂಗಭದ್ರಾ ಅಣೆಕಟ್ಟೆಯ ಕ್ರೆಸ್ಟ್ಗೇಟ್ ಬದಲಾವಣೆ ಕಾಮಗಾರಿ ಅಂತಿಮ ಹಂತ ತಲುಪಿದ್ದು, ಸಮರ್ಪಕ ನಿರ್ವಹಣೆ ಮಾಡಿದರೆ ಹೊಸ ಗೇಟ್ಗಳು 50ರಿಂದ 70 ವರ್ಷಗಳವರೆಗೆ ಬಾಳಿಕೆ ಬರಲಿವೆ ಎಂದು ಕ್ರೆಸ್ಟ್ಗೇಟ್ ತಜ್ಞ ಕನ್ಹಯ್ಯ ನಾಯ್ಡು ಹೇಳಿದ್ದಾರೆ.
ಅಣೆಕಟ್ಟೆಯಲ್ಲಿನ ಗೇಟ್ ಅಳವಡಿಕೆ ಕಾಮಗಾರಿಯನ್ನು ಮಂಗಳವಾರ ವೀಕ್ಷಿಸಿದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಯಾವುದೇ ನಿರ್ವಹಣೆ ಇಲ್ಲದಿದ್ದರೆ ಗೇಟ್ಗಳು ಸುಮಾರು 20 ವರ್ಷಗಳಷ್ಟೇ ಕಾರ್ಯಕ್ಷಮವಾಗಿರುತ್ತವೆ. ಆದರೆ, ವರ್ಷಾವರ್ಷ ಸಮರ್ಪಕ ನಿರ್ವಹಣೆ ಮಾಡಿದರೆ 70 ವರ್ಷಗಳವರೆಗೆ ಯಾವುದೇ ತೊಂದರೆ ಇಲ್ಲದೆ ಬಳಸಬಹುದು” ಎಂದು ವಿವರಿಸಿದರು.
ರಾಷ್ಟ್ರೀಯ ಅಣೆಕಟ್ಟೆ ಸುರಕ್ಷತಾ ಪ್ರಾಧಿಕಾರದ ಸದಸ್ಯರಾಗಿರುವ ಅವರು, ಗೇಟ್ಗಳ ಸುರಕ್ಷತೆ ಕುರಿತು ಪ್ರಮಾಣಪತ್ರ ನೀಡಿದ ಬಳಿಕ ಯಾವುದೇ ಅನುಮಾನಕ್ಕೆ ಅವಕಾಶ ಇರುವುದಿಲ್ಲ ಎಂದು ಸ್ಪಷ್ಟಪಡಿಸಿದರು. “ಇಲ್ಲಿನ ಕಾಮಗಾರಿಗಳು ತಾಂತ್ರಿಕವಾಗಿ ಪರಿಪೂರ್ಣವಾಗಿ ನಡೆದಿವೆ” ಎಂದು ಅವರು ಹೇಳಿದರು.
ಕಾಮಗಾರಿ ಅಂತಿಮ ಹಂತದಲ್ಲಿ
ತುಂಗಭದ್ರಾ ಅಣೆಕಟ್ಟೆಯಲ್ಲಿ ಒಟ್ಟು 33 ಕ್ರೆಸ್ಟ್ಗೇಟ್ಗಳ ಪೈಕಿ 26 ಗೇಟ್ಗಳ ಅಳವಡಿಕೆ ಪೂರ್ಣಗೊಂಡಿದ್ದು, ಇದರಲ್ಲಿ 15 ಗೇಟ್ಗಳಿಗೆ ಯಶಸ್ವಿಯಾಗಿ ಪರೀಕ್ಷೆ ನಡೆಸಲಾಗಿದೆ. ಕೆಲವು ಗೇಟ್ಗಳಿಗೆ ಸ್ಲಿಮ್ ಪ್ಲೇಟ್ ಅಳವಡಿಕೆ ಪ್ರಕ್ರಿಯೆ ನಡೆಯುತ್ತಿದೆ. ಕೊನೆಯ ಗೇಟ್ ಅಳವಡಿಕೆ ಕಾರ್ಯ ಮಂಗಳವಾರ ಆರಂಭವಾಗಿದ್ದು, ಶನಿವಾರದೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.
ಈ ತಿಂಗಳ ಅಂತ್ಯದೊಳಗೆ ವೆಲ್ಡಿಂಗ್ ಕಾರ್ಯಗಳು ಮುಗಿಯಲಿದ್ದು, ಮೇ 11ರ ವೇಳೆಗೆ ಚೆನ್ನೈಯಿಂದ ಚೈನ್ಲಿಂಕ್ ಭಾಗಗಳು ತಲುಪಲಿವೆ. ಮೇ 15ರೊಳಗೆ ಚೈನ್ ಅಳವಡಿಕೆ ಹೊರತುಪಡಿಸಿ ಉಳಿದ ಎಲ್ಲಾ ಕೆಲಸಗಳು ಪೂರ್ಣಗೊಳ್ಳಲಿವೆ ಎಂದು ಕನ್ಹಯ್ಯ ನಾಯ್ಡು ತಿಳಿಸಿದರು.
ಮಳೆಯಲ್ಲಿಯೂ ಕೆಲಸ ಸಾಧ್ಯ
ಚೈನ್ಲಿಂಕ್ ಅಳವಡಿಕೆ ಪ್ರಕ್ರಿಯೆ ಹೆಚ್ಚಿನ ಕಷ್ಟದದ್ದಲ್ಲ. ಒಂದು ದಿನಕ್ಕೆ ಒಂದು ಗೇಟ್ಗೆ ಚೈನ್ ಅಳವಡಿಸಲು ಸಾಧ್ಯವಿದೆ. ಜಲಾಶಯದಲ್ಲಿ ನೀರು ಸಂಗ್ರಹವಾಗಿದ್ದರೂ ಈ ಕಾರ್ಯವನ್ನು ನಿರ್ವಹಿಸಬಹುದು. ಹೀಗಾಗಿ, ಮೇ ಮಧ್ಯಭಾಗದಲ್ಲಿ ಭಾರಿ ಮಳೆಯಾದರೂ ನೀರು ಸಂಗ್ರಹಕ್ಕೆ ಯಾವುದೇ ಅಡ್ಡಿ ಇರುವುದಿಲ್ಲ ಎಂದು ಅವರು ಭರವಸೆ ನೀಡಿದರು.
₹51 ಕೋಟಿ ವೆಚ್ಚದ ಮಹತ್ವದ ಯೋಜನೆ
ತುಂಗಭದ್ರಾ ಮಂಡಳಿಯ ಕಾರ್ಯದರ್ಶಿ ಒ.ಆರ್.ಕೆ. ರೆಡ್ಡಿ ಮಾಹಿತಿ ನೀಡಿದ್ದು, ಒಟ್ಟು ₹51 ಕೋಟಿ ವೆಚ್ಚದಲ್ಲಿ ಈ ಕಾಮಗಾರಿ ಕೈಗೊಳ್ಳಲಾಗಿದೆ. ಗೇಟ್ಗಳ ನಿರ್ಮಾಣಕ್ಕೆ ₹44 ಕೋಟಿ, ಚೈನ್ಲಿಂಕ್ ಅಳವಡಿಕೆಗೆ ₹5.1 ಕೋಟಿ ಹಾಗೂ ಸಲಹಾ ವೆಚ್ಚವಾಗಿ ₹1.34 ಕೋಟಿ ಮೀಸಲಿರಿಸಲಾಗಿದೆ. ಇದುವರೆಗೆ ₹29.5 ಕೋಟಿ ಗುತ್ತಿಗೆದಾರರಿಗೆ ಪಾವತಿಸಲಾಗಿದೆ ಎಂದು ತಿಳಿಸಿದರು.
ಈ ವೇಳೆ ಅಧೀಕ್ಷಕ ಎಂಜಿನಿಯರ್ ನಾರಾಯಣ ನಾಯ್ಕ, ಎಂಜಿನಿಯರ್ಗಳಾದ ಜ್ಞಾನೇಶ್ವರ್ ಮತ್ತು ಕಿರಣ್ ಉಪಸ್ಥಿತರಿದ್ದರು.
ನೀರು ಸಂಗ್ರಹ ಸಾಮರ್ಥ್ಯ: 100 ಟಿಎಂಸಿ ಗುರಿ
133 ಟಿಎಂಸಿ ಅಡಿ ಸಾಮರ್ಥ್ಯದ ತುಂಗಭದ್ರಾ ಜಲಾಶಯದಲ್ಲಿ ಸುಮಾರು 31 ಟಿಎಂಸಿ ಅಡಿ ಹೂಳು ಸಂಗ್ರಹವಾಗಿದೆ ಎಂದು ಅಂದಾಜಿಸಲಾಗಿದೆ. ಇದರ ಪರಿಣಾಮವಾಗಿ ಜಲಾಶಯದ ವಾಸ್ತವಿಕ ನೀರು ಸಂಗ್ರಹ ಸಾಮರ್ಥ್ಯ ಸುಮಾರು 102 ಟಿಎಂಸಿ ಅಡಿಯಷ್ಟಿದೆ. ಆದರೂ ಸುರಕ್ಷತಾ ದೃಷ್ಟಿಯಿಂದ 100 ಟಿಎಂಸಿ ಅಡಿ ನೀರು ಸಂಗ್ರಹಿಸುವ ಗುರಿ ಹೊಂದಲಾಗಿದೆ.
ಮುಂಗಾರು ಮಳೆ ಸಮರ್ಪಕವಾಗಿ ಬಂದರೆ ರೈತರ ಎರಡೂ ಹಂಗಾಮುಗಳಿಗೆ ನೀರು ಲಭ್ಯವಾಗಲಿದೆ ಎಂಬ ವಿಶ್ವಾಸವನ್ನು ಕನ್ಹಯ್ಯ ನಾಯ್ಡು ವ್ಯಕ್ತಪಡಿಸಿದರು.
ನಿಯಮಿತ ನಿರ್ವಹಣೆ ಮುಖ್ಯ
ಪ್ರತಿ ವರ್ಷ 11 ಗೇಟ್ಗಳಂತೆ ಮೂರು ವರ್ಷಕ್ಕೊಮ್ಮೆ ಸಂಪೂರ್ಣ 33 ಗೇಟ್ಗಳ ನಿರ್ವಹಣೆ ಕೈಗೊಳ್ಳುವ ಯೋಜನೆ ರೂಪಿಸಲಾಗಿದೆ. ಈ ಕ್ರಮವನ್ನು ಕಟ್ಟುನಿಟ್ಟಾಗಿ ಅನುಸರಿಸಿದರೆ ಕ್ರೆಸ್ಟ್ಗೇಟ್ಗಳ ದೀರ್ಘಾವಧಿ ಬಾಳಿಕೆ ಖಚಿತವಾಗಲಿದೆ ಎಂದು ತಜ್ಞರು ಹೇಳಿದರು.
ತಮ್ಮ ಆಕ್ಷೇಪಣೆಗಳ ಬಳಿಕ ಸರ್ಕಾರ ಹಣ ಬಿಡುಗಡೆ ಮಾಡಿದ ವಿಚಾರವನ್ನು ಸ್ಮರಿಸಿದ ಕನ್ಹಯ್ಯ ನಾಯ್ಡು, ಕಾಮಗಾರಿಗೆ ಅಡ್ಡಿ ತರದ ಮಾಧ್ಯಮಗಳಿಗೆ ಕೃತಜ್ಞತೆ ಸಲ್ಲಿಸಿದರು.