ಐತಿಹಾಸಿಕ ಕಿತ್ತೂರಿಗೆ ಹೊಸ ಎಸ್.ಪಿ.ಯವರ ದಿಢೀರ್ ಭೇಟಿ!

ಚನ್ನಮ್ಮನ ಕಿತ್ತೂರು : ನೂತನವಾಗಿ ಬೆಳಗಾವಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಯಾಗಿ ಅಧಿಕಾರ ವಹಿಸಿಕೊಂಡಿರುವ ಕೆ. ರಾಮರಾಜನ್ ಅವರು ರವಿವಾರ ಚನ್ನಮ್ಮನ ಕಿತ್ತೂರಿನ ಪೊಲೀಸ್ ಠಾಣೆಗೆ ದಿಢೀರ್ ಭೇಟಿ ನೀಡಿ ಸಂಪೂರ್ಣ ಪರಿಶೀಲನೆ ನಡೆಸಿದರು.

ಜಿಲ್ಲೆಯಾದ್ಯಂತ ಭೇಟಿ ನೀಡುವ ಪ್ರಕ್ರಿಯೆಯ ಭಾಗವಾಗಿ ಕಿತ್ತೂರಿಗೆ ಆಗಮಿಸಿದ್ದ ಎಸ್.ಪಿ. ರಾಮರಾಜನ್ ಅವರು ಪೊಲೀಸ್ ಸಿಬ್ಬಂದಿಯೊಂದಿಗೆ ಪರೇಡ್ ನಡೆಸಿ, ಠಾಣೆಯ ಕಾರ್ಯವೈಖರಿ ಮತ್ತು ಸಿದ್ಧತೆಗಳನ್ನು ಪರಿಶೀಲಿಸಿದರು.

ಈ ಸಂದರ್ಭದಲ್ಲಿ ಪತ್ರಕರ್ತರೊಂದಿಗೆ ಮಾತನಾಡಿದ ಎಸ್.ಪಿ. ಕೆ. ರಾಮರಾಜನ್ ಅವರು, “ನಾನು ನೂತನವಾಗಿ ಬೆಳಗಾವಿಗೆ ಆಗಮಿಸಿದ್ದೇನೆ. ಈ ಹಿನ್ನೆಲೆಯಲ್ಲಿ ಜಿಲ್ಲೆಯ ಎಲ್ಲ ಪೊಲೀಸ್ ಠಾಣೆಗಳಿಗೆ ಭೇಟಿ ನೀಡುತ್ತಿದ್ದೇನೆ,” ಎಂದು ತಿಳಿಸಿದರು.

ಅತ್ಯಂತ ಪ್ರಮುಖವಾಗಿ, ಅವರು ಮುಂದಿನ ವಾರದಲ್ಲಿ ಕಿತ್ತೂರಿಗೆ ಮತ್ತೆ ಭೇಟಿ ನೀಡುವ ಭರವಸೆ ನೀಡಿದರು. “ಮುಂದಿನ ವಾರದಲ್ಲಿ ಮತ್ತೆ ಬಂದು ಜನಸಂಪರ್ಕ ಸಭೆ ಮಾಡಿ, ಸಾರ್ವಜನಿಕರಿಗೆ ಆಗುತ್ತಿರುವ ಕುಂದುಕೊರತೆಗಳ ಕುರಿತು ಚರ್ಚಿಸಿ, ಪರಿಹಾರಗಳ ಕುರಿತು ಕ್ರಮ ವಹಿಸುತ್ತೇವೆ,” ಎಂದು ಘೋಷಿಸಿದರು. ಈ ಮೂಲಕ ಸಾರ್ವಜನಿಕ ಸ್ನೇಹಿ ಆಡಳಿತಕ್ಕೆ ಒತ್ತು ನೀಡುವ ಸಂದೇಶ ರವಾನಿಸಿದರು.

ಐತಿಹಾಸಿಕ ಮಹತ್ವವುಳ್ಳ ಚನ್ನಮ್ಮನ ನಾಡಿನ ಕುರಿತು ಶ್ಲಾಘನೆಯ ಮಾತುಗಳನ್ನಾಡಿದ ಅವರು, ಕಿತ್ತೂರಿನ ಹೆಗ್ಗಳಿಕೆಯನ್ನು ನೆನೆದರು.

ಈ ಸಂದರ್ಭದಲ್ಲಿ ಡಿವೈಎಸ್‌‌ಪಿ ಡಾ. ವಿರಯ್ಯ ಹಿರೇಮಠ, ಸಿಪಿಐ ಶಿವಾನಂದ ಗುಡಗನಟ್ಟಿ, ಪಿಎಸ್‌ಐ ಪ್ರವೀಣ ಗಂಗೊಳ ಸೇರಿದಂತೆ ಠಾಣೆಯ ಹಿರಿಯ ಸಿಬ್ಬಂದಿ ಉಪಸ್ಥಿತರಿದ್ದರು.