ಮಹಾಲಿಂಗಪುರ: ನಗರದ ಕೆಂಗೇರಿಮಡ್ಡಿ ಬಡಾವಣೆಯಲ್ಲಿರುವ ಶ್ರೀ ಸಾಯಿ ಸರೋವರದಲ್ಲಿ ಮಳೆಗಾಲದ ಬಳಿಕ ನೀರು ತುಂಬಿ ಕಂಗೊಳಿಸುತ್ತಿರುವ ಹಿನ್ನೆಲೆಯಲ್ಲಿ ಮಾಜಿ ಪುರಸಭೆ ಅಧ್ಯಕ್ಷ ಶೇಖರ ಅಂಗಡಿ ಅವರು ಬಾಗಿನ ಅರ್ಪಿಸಿ, ಜಲಮೂಲಕ್ಕೆ ಗೌರವ ಸಲ್ಲಿಸಿದರು.
ಪ್ರಕೃತಿಯ ಕೊಡುಗೆಯಾದ ನೀರನ್ನು ಸಂರಕ್ಷಿಸುವುದು ಪ್ರತಿಯೊಬ್ಬರ ಜವಾಬ್ದಾರಿಯಾಗಿದೆ. ಮಳೆ ನೀರನ್ನು ಸಮರ್ಪಕವಾಗಿ ಸಂಗ್ರಹಿಸುವ ಮೂಲಕ ಕೆರೆ, ಸರೋವರ ಹಾಗೂ ಇತರ ಜಲಮೂಲಗಳನ್ನು ಜೀವಂತವಾಗಿಟ್ಟುಕೊಂಡರೆ ಸುತ್ತಮುತ್ತಲಿನ ಪ್ರದೇಶದ ಅಂತರ್ಜಲ ಮಟ್ಟ ಹೆಚ್ಚುವುದರ ಜೊತೆಗೆ ಜನರು ಹಾಗೂ ಜಾನುವಾರುಗಳಿಗೆ ನೀರಿನ ಆಸರೆಯಾಗುತ್ತದೆ. ಈ ಹಿನ್ನೆಲೆಯಲ್ಲಿ ಶ್ರೀ ಸಾಯಿ ಸರೋವರಕ್ಕೆ ಬಾಗಿನ ಅರ್ಪಿಸಿರುವುದು ಸ್ಥಳೀಯರಲ್ಲಿ ಸಂತಸ ಮೂಡಿಸಿತು.
ಈ ಸಂದರ್ಭದಲ್ಲಿ ಮಾತನಾಡಿದ ಶೇಖರ ಅಂಗಡಿ, ಮಳೆ ನೀರು ವ್ಯರ್ಥವಾಗಿ ಹರಿದುಹೋಗದೆ ಕೆರೆ-ಸರೋವರಗಳಲ್ಲಿ ಸಂಗ್ರಹವಾಗುವುದರಿಂದ ಪರಿಸರದ ಸಮತೋಲನ ಕಾಪಾಡಲು ಸಹಕಾರಿಯಾಗುತ್ತದೆ. ಜಲಮೂಲಗಳ ಸಂರಕ್ಷಣೆ ಕೇವಲ ಸರ್ಕಾರದ ಜವಾಬ್ದಾರಿಯಲ್ಲ; ಸಾರ್ವಜನಿಕರೂ ಅದರ ರಕ್ಷಣೆಗೆ ಕೈಜೋಡಿಸಬೇಕು. ಕೆರೆ-ಸರೋವರಗಳು ತುಂಬಿದಾಗ ರೈತರು, ಸಾರ್ವಜನಿಕರು ಹಾಗೂ ಜಾನುವಾರುಗಳ ಬದುಕಿನಲ್ಲಿ ಹೊಸ ಭರವಸೆ ಮೂಡುತ್ತದೆ. ಹೀಗಾಗಿ ಇಂತಹ ಜಲಮೂಲಗಳನ್ನು ಸ್ವಚ್ಛವಾಗಿಟ್ಟುಕೊಂಡು ಮುಂದಿನ ಪೀಳಿಗೆಗೂ ಉಳಿಸಿಕೊಳ್ಳುವ ಸಂಕಲ್ಪ ಮಾಡಬೇಕು ಎಂದು ಹೇಳಿದರು.
ಬಾಗಿನ ಅರ್ಪಿಸುವ ಸಂದರ್ಭದಲ್ಲಿ ಸ್ಥಳೀಯರು ಒಗ್ಗಟ್ಟಿನಿಂದ ಭಾಗವಹಿಸಿ, ಸರೋವರದ ನೀರಿಗೆ ಪೂಜೆ ಸಲ್ಲಿಸಿ, ಉತ್ತಮ ಮಳೆ, ಸಮೃದ್ಧಿ ಹಾಗೂ ಜನರ ಬದುಕಿನಲ್ಲಿ ನೆಮ್ಮದಿ ನೆಲೆಸಲಿ ಎಂದು ಪ್ರಾರ್ಥಿಸಿದರು. ನೀರಿನ ಹನಿ ಉಳಿದರೆ ಬದುಕಿನ ಭರವಸೆ ಉಳಿಯುತ್ತದೆ ಎಂಬ ಸಂದೇಶವನ್ನು ಸಾರಿದ ಈ ಕಾರ್ಯಕ್ರಮ ಸ್ಥಳೀಯರಲ್ಲಿ ಗಮನ ಸೆಳೆಯಿತು.
ಈ ಸಂದರ್ಭದಲ್ಲಿ ವಿಠ್ಠಲ ಕುಳಲಿ, ಮುತ್ತಪ್ಪ ಕುಂದ್ರಾಳ, ಸಿದ್ದಪ್ಪ ರಾಮೋಜಿ, ಮಹಾಲಿಂಗ ಶಿವಣಗಿ, ಗಂಗಪ್ಪ ದಿನ್ನಮನಿ, ಮಹಾದೇವ ಸಾವಂತ, ಚನ್ನಪ್ಪ ಬಳಿಗಾರ, ಮಲಪ್ಪ ಕಂಪು, ಮಹೇಶ ಹುಣಸ್ಯಾಳ, ಬಿಮ್ಮಪ್ಪ ಆರೆಗಾರ, ಗುರು ಹಿಪ್ಪರಗಿ, ಪರಶುರಾಮ ಅಮರಾವತಿ, ಮಹಾಲಿಂಗ ನಾಯಕ, ಪರಶು ಚನ್ನಾಳ, ಕಾಡಪ್ಪ ನಾವಿ, ಬಸವರಾಜ ಹಿಪ್ಪರಗಿ, ತಿಪ್ಪಣ್ಣ ಬಂಡಿವಡ್ಡರ, ಶಾರದಾ ಜಿಡ್ಡಿಮನಿ, ಕಸ್ತೂರಿ ಪೂಜಾರಿ, ಸರಸ್ವತಿ ರಾಮೋಜಿ, ರೇಣುಕಾ ಬಂಡಿವಡ್ಡರ ಸೇರಿದಂತೆ ಬಡಾವಣೆಯ ಮುಖಂಡರು, ಮಹಿಳೆಯರು ಹಾಗೂ ಸ್ಥಳೀಯರು ಉಪಸ್ಥಿತರಿದ್ದರು.
