ವಿಶ್ವದ ದೊಡ್ಡಣ್ಣ ಅಮೆರಿಕವು ಎಚ್-1ಬಿ ವೀಸಾ(H-1B Visa)ಕ್ಕೆ 1 ಲಕ್ಷ ಡಾಲರ್ ಶುಲ್ಕವನ್ನು ವಿಧಿಸಿದ ಬಳಿಕ ಪ್ರಪಂಚದಾದ್ಯಂತ ಅದರಲ್ಲೂ ಭಾರತಕ್ಕೆ ಹೆಚ್ಚಿನ ಭೀತಿ ಉಂಟಾಗಿದೆ. ಈ ಹೊತ್ತಲ್ಲೇ ನೆರೆಯ ರಾಷ್ಟ್ರ ಚೀನಾ ಜಾಗತಿಕ ಪ್ರತಿಭೆಗಳನ್ನು ಆಕರ್ಷಿಸಲು ಹೊಸ ಕ್ರಮ ಕೈಗೊಂಡಿದೆ. ಚೀನಾ ಅಕ್ಟೋಬರ್ 1ರಿಂದ ಹೊಸ ‘ಕೆ ವೀಸಾ’ವನ್ನು ಪ್ರಾರಂಭಿಸುವುದಾಗಿ ಘೋಷಿಸಿದೆ. ಅಮೆರಿಕಕ್ಕೆ ಸೆಡ್ಡು ಹೊಡೆಯಲು ಚೀನಾ ಈ ಕ್ರಮ ಕೈಗೊಂಡಂತಿದೆ.
ಭಾನುವಾರ ಬಿಡುಗಡೆಯಾದ ಅಧಿಕೃತ ಹೇಳಿಕೆಯಲ್ಲಿ, ಪ್ರಪಂಚದಾದ್ಯಂತದ ಯುವ ಮತ್ತು ಪ್ರತಿಭಾನ್ವಿತ ವೃತ್ತಿಪರರನ್ನು, ವಿಶೇಷವಾಗಿ ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್ ಮತ್ತು ಗಣಿತ ಕ್ಷೇತ್ರದಲ್ಲಿ ಆಕರ್ಷಿಸಲು ಚೀನಾ ಹೊಸ ‘ಕೆ ವೀಸಾ’ವನ್ನು ಪ್ರಾರಂಭಿಸುವುದಾಗಿ ಘೋಷಿಸಿದೆ ಎಂದು ತಿಳಿಸಿದೆ.
ಕೆ ವೀಸಾ ಎಂದರೇನು? ಈ ವೀಸಾ ನಿಯಮವು ವಿದೇಶಿಯರ ಪ್ರವೇಶ ಮತ್ತು ನಿರ್ಗಮನವನ್ನು ನಿಯಂತ್ರಿಸುವ ನಿಯಮಗಳನ್ನು ಸಡಿಲಗೊಳಿಸುತ್ತದೆ. ಇದು ಅಕ್ಟೋಬರ್ 1, 2025 ರಿಂದ ಜಾರಿಗೆ ಬರಲಿದೆ. ಕೆ ವೀಸಾ ವ್ಯವಸ್ಥೆಯನ್ನು, ಯುಎಸ್ H-1B ವೀಸಾದ ಚೀನೀ ಆವೃತ್ತಿ ಎಂದು ಕರೆಯುತ್ತಿದ್ದಾರೆ.