ಭಾರತೀಯ ಔಷಧ ಕಂಪನಿ ಮೇಲೆ ಕ್ಷಿಪಣಿ ದಾಳಿ; ಉಕ್ರೇನ್‌ನ ಆರೋಪ ತಳ್ಳಿ ಹಾಕಿದ ರಷ್ಯಾ

ಮಾಸ್ಕೋ(ರಷ್ಯಾ): ಕೀವ್​​ನಲ್ಲಿರುವ ಭಾರತೀಯ ಔಷಧೀಯ ಕಂಪನಿಯೊಂದರ ಗೋಡೌನ್​ ಮೇಲೆ ರಷ್ಯಾ ಕ್ಷಿಪಣಿ ದಾಳಿ ಮಾಡಿದೆ ಎಂಬ ಉಕ್ರೇನ್‌ನ ಆರೋಪವನ್ನು ರಷ್ಯಾ ಗುರುವಾರ ತಳ್ಳಿಹಾಕಿದೆ.

ಕುಸುಮ್​ ಹೆಲ್ತ್​ಕೇರ್​ ನಿರ್ವಹಣೆಯ ಗೋದಾಮನ್ನು ಕೆಡವಿದ ಕ್ಷಿಪಣಿ, ಉಕ್ರೇನ್​ನ ಸ್ವಂತ ವಾಯು ರಕ್ಷಣಾ ಕ್ಷಿಪಣಿಗಳಲ್ಲಿ ಒಂದಾಗಿರಬಹುದು ಎಂದು ಭಾರತದಲ್ಲಿನ ರಷ್ಯಾದ ರಾಯಭಾರ ಕಚೇರಿ ಉಕ್ರೇನ್​ ಮೇಲೆ ಪ್ರತಿ ಆರೋಪ ಮಾಡಿದೆ.

ಈ ಬಗ್ಗೆ ಸಾಮಾಜಿಕ ಜಾಲತಾಣ ಎಕ್ಸ್​ನಲ್ಲಿ ಪೋಸ್ಟ್​ ಹಂಚಿಕೊಂಡಿರುವ ರಷ್ಯಾ, “ಭಾರತದಲ್ಲಿರುವ ಉಕ್ರೇನ್​ ರಾಯಭಾರ ಕಚೇರಿ ಹರಡಿದ ಆರೋಪಗಳಿಗೆ ಪ್ರತಿಕ್ರಿಯೆಯಾಗಿ, ರಷ್ಯಾದ ಸಶಸ್ತ್ರ ಪಡೆಗಳು ಏಪ್ರಿಲ್​ 12ರಂದು ಕೀವ್​ ಪೂರ್ವಭಾಗದಲ್ಲಿರುವ ಕುಸುಮ್​ ಹೆಲ್ತ್​ಕೇರ್​ನ ಫಾರ್ಮಸಿ ಗೋದಾಮಿನ ಮೇಲೆ ದಾಳಿ ಮಾಡಿಲ್ಲ ಅಥವಾ ದಾಳಿ ಮಾಡುವ ಯಾವುದೇ ಯೋಜನೆಯನ್ನೂ ಮಾಡಿಲ್ಲ ಎಂದು ನವದೆಹಲಿಯಲ್ಲಿರುವ ರಷ್ಯಾದ ರಾಯಭಾರ ಕಚೇರಿ ಖಚಿತಪಡಿಸುತ್ತದೆ” ಎಂದು ಹೇಳಿದೆ.

ರಷ್ಯಾ ಸ್ಪಷ್ಟನೆ ಹೀಗಿದೆ: ಆ ದಿನ ರಷ್ಯಾದ ಯುದ್ಧತಂತ್ರದ ವಾಯುಯಾನ, ಮಾನವ ರಹಿತ ವೈಮಾನಿಕ ವಾಹನಗಳು ಮತ್ತು ಕ್ಷಿಪಣಿ ಪಡೆಗಳು, ಸಂಪೂರ್ಣವಾಗಿ ಬೇರೆಯೇ ಸ್ಥಳದಲ್ಲಿದ್ದ ಉಕ್ರೇನಿಯನ್​ ಮಿಲಿಟರಿ ಕೈಗಾರಿಕಾ ಸಂಕೀರ್ಣದ ವಾಯುಯಾನ ಸ್ಥಾವರ, ಮಿಲಿಟರಿ ವಾಯುನೆಲೆಯ ಮೂಲಸೌಕರ್ಯ ಮತ್ತು ಶಸ್ತ್ರಸಜ್ಜಿತ ವಾಹನ ದುರಸ್ತಿ ಮತ್ತು ಯುಎವಿ ಅಸೆಂಬ್ಲಿ ಕಾರ್ಯಾಗಾರಗಳ ಮೇಲೆ ದಾಳಿ ನಡೆಸಿದ್ದವು ಎಂದು ವಿವರಿಸಿದೆ.